கணினி அமைப்பின் கூறுகள் (Components of a Computer System)

ஒரு கணினி என்பது வெறும் இயந்திரம் மட்டுமல்ல. அது பல கூறுகளின் ஒருங்கிணைந்த அமைப்பாகும். ஒரு கணினி முறைமை வெற்றிகரமாக இயங்குவதற்கு நான்கு பிரதான கூறுகள் அவசியமானவை. அவை:

வன்பொருள் (Hardware)
மென்பொருள் (Software)
பயனர் (Liveware)
தரவு மற்றும் தகவல் (Data and Information)

இந்த நான்கில் ஒன்று இல்லாவிட்டாலும் கணினி முறைமை முழுமையடையாது.

1. வன்பொருள் (Hardware)

கணினியின் பாகங்களில் தொட்டுணரக்கூடிய அனைத்தும் வன்பொருள் எனப்படும். இவை கணினியின் பௌதீகப் பாகங்களாகும்.

உதாரணங்கள்: விசைப்பலகை (Keyboard), சுட்டி (Mouse), மத்திய முறைவழி அலகு (CPU), திரை (Monitor), அச்சுப்பொறி (Printer).
வகைகள்: உள்ளீட்டுச் சாதனங்கள், முறைவழிப்படுத்தும் சாதனங்கள், வெளியீட்டுச் சாதனங்கள் மற்றும் தேக்கச் சாதனங்கள்.

2. மென்பொருள் (Software)

கணினியின் வன்பொருட்களைச் செயற்படுத்துவதற்கு வழங்கப்படுகின்ற கட்டளைகளின் தொகுப்பே மென்பொருள் எனப்படும். மென்பொருட்களை நம்மால் தொட்டுணர முடியாது. வன்பொருளுக்கு உயிர் கொடுப்பது மென்பொருளாகும்.

முறைமை மென்பொருள் (System Software): கணினி இயங்கத் தேவையானவை. (உதாரணம்: Windows, Android).
பயன்பாட்டு மென்பொருள் (Application Software): ஒரு குறிப்பிட்ட வேலையைச் செய்யப் பயன்படுபவை. (உதாரணம்: MS Word, VLC Player).

3. பயனர் (Liveware)

கணினியை இயக்குபவர் அல்லது பயன்படுத்துபவர் பயனர் என அழைக்கப்படுவார். ஒரு கணினியில் சிறந்த வன்பொருள்களும் மென்பொருள்களும் காணப்படுகின்றபோதிலும் அதனை இயக்குவதற்கு மனித அறிவு அவசியம்.

பயனரின் வகைகள்: சாதாரண பயனர் (User), கணினி நிரலாளர் (Programmer), கணினி ஆய்வாளர் (System Analyst), தரவுத்தள நிர்வாகி (Database Administrator).

4. தரவு மற்றும் தகவல் (Data & Information)

தரவு என்பது கணினிக்கு வழங்கப்படுவதும், தகவல் என்பது கணினியிடமிருந்து நாம் பெறுவதுமாகும்.

தரவு (Data): முறைவழிப்படுத்தப்படாத அடிப்படை அம்சங்கள் ‘தரவு’ எனப்படும். இவை பொதுவாகப் பயனற்றவையாகத் தோன்றும். (உதாரணம்: 80, 90, 75).
தகவல் (Information): தரவுகளை முறைவழிப்படுத்திய பிறகு கிடைக்கும் பயனுள்ள முடிவு ‘தகவல்’ எனப்படும். (உதாரணம்: 245).

ஒட்டுமொத்த செயல்பாடு (Overall Interaction):

பயனர் (Liveware), ஒரு மென்பொருளைப் (Software) பயன்படுத்தி, வன்பொருள் (Hardware) ஊடாகத் தரவுகளை (Data) உள்ளீடு செய்கிறார். கணினி அதனை முறைவழிப்படுத்தி நமக்குத் தகவலாக (Information) வழங்குகிறது.

கணினி அமைப்பின் கூறுகள் (Components of a Computer System)